حسین دوزگونون شعری (شهید «ثقة الاسلام»ین خاطره‌سینه)

دوغوم

(شهید «ثقة الاسلام»ین خاطره‌سینه)

- 1 –

اَشْهَدُ اَنَّ عَلیًّ وَلیُّ الله

مناره‌دن قالخدی اذانین سسی

حاج میرزا موسی دردی نفسی

آغزینی باغلادی، گؤزلرین یومدو

ان انگین الاهی رؤیایا جومدو:

«شهادت وئریرم، اولونوز آگاه

گؤرۆنمز آللاهدان باشقا یوخ الله

کیمسه‌یه اگیلمک یاراشماز سنه

قول اولارلار هامی «عبدم» دئینه

عبد اولان، اینانان تک بیر آللاها

دُنیادا قول اولماز پاشایا، شاها ... »

 

حاجی میرزا موسی نشئه‌له‌یزدی

دئییردی:

شریکی یوخ، الله بیردی!

دالمیشدی قرآنا هم آیاتا او

معنویت دولو خیالاتا او

چکنده علی‌نین مؤذن آدین

مسافرین موسی دویدو فریادّین.

یئریندن قوپاراق شنلیگه قالخدی

باجادان اوتاغین ایچینه باخدی

دوغرودور، دوغولدو اوشاغی اونون.

 

- 2 -

الله خیر ائله‌سین «علی»نین سونون ...

تاسوعا آخشامی تبریز آغلارکن،

میرزا اسدالله ایله بیرلیکده

ائودن چؤله چیخدی اولو سرکرده

دۆشۆنجه‌یه جومموش، فکره دالمیشدی.

دوران اونو چوخ پیس حالا سالمیشدی.

قورخو، سانسور، تفتیش سارمیش هریانی

آزادلیق فریادین هایغیران هانی؟

داش فرشین اۆستۆنده سۆرۆنۆدۆ او،

غمگین، یورغون، توتغون گؤرۆنۆردۆ او.

آغیر سۆرۆتلۆردۆ ایکی نعلئینی

هر شئیدن آغیرلیق چیکردی بئینی

تبریز اونو یامان فکره سالمیشدی

دوران گئدیشینه لاپ مات قالمیشدی

نه‌دیر بو دُشمندن یاردیم ایسته‌مک

هر جایی‌لار کیمی‌ اولماسین اۆره‌ک؟

ساتارمی یوواسین، ائوین، ائولادین

سایمازمی بیر پولا بالا فریادین؟

سالدات قیرباجیغا توش گلمیش وطن

دئدیگیمه عمل ائتمه‌لییم من

شَهَر نییه دُشمن الینده قالا؟

نئجه ساووشاجاق بو آغیربلا!

ناحق فرمانلارا من قول قویمارام

سون داملاسینا کیمی قانیمین وارام.

 

نوشتن دیدگاه


تصویر امنیتی
تصویر امنیتی جدید