مراسم سالروز تولد دکتر حسین محمدزاده صدیق- بخش دوم 1391

گوزگو

ولی شاه‌محمدی (گولدورلو ولی)

 

قارانلیقا ایشیق او اوره‌ک گوزگون،

حقیقته آیدین بیر یول گؤستریر.

عمان‌سان علمینده آی استاد دوزگون،

او بارلی علمیندن هر یئتن‌ ده‌ریر.

 

شعرین ایشیق ساچیر قارانلیقلارا،

ائل گئدن یوللاردا بیر چراغ تکین.

هر کسی چاتدیریر اؤز مکانینا،

دئییر اوره‌کلرده محبت اکین.

 

هر بیر مصراعلارین داغلاردان آغیر،

شیمشکلر یاغمیرلار توفانلار بیلیر.

سحریلی قلمین اعجازلار یاغیر،

غواص تک عمقینه جومانلار بیلیر.

 

بوتون آذربایجان افتخاریسان،

دونیا احسن دئییر، ائل احسن دئییر.

شمسین نسیمینین یادگاریسان،

اوره‌ک احسن دئییر، دیل احسن دئییر.

 

تاریخ بویو قالاجاقسان دیری‌سن،

نسیل- نسیل خلقیمیزین دیلینده.

شعریّتین اوجاقیسان، پیری سن،

فخر ائله‌ییر ائولادین‌ دا ائلینده.

 

هر بیتین دریادیر، هر سطرین دنیز،

اؤزون او دریادا ماهر اوزگوچو.

کلمه‌ن دنیزلرین دالقالاریدی،

خلقیوین یولوندا سؤزون گوزگوچو.

 

گون تکین یاییلان دونیایا آدی،

عاجزم وصفینده نه یازیم استاد.

«گولدورلو ولی»نین قلم استادی،

نه دیلیم اویغوندو، نه یازیم استاد.

دوزگونه عاشیق 

سید مراد موسی‌پور

 

بیر ساقی الیندن بیر باده ایچدیم،

سانکی بیر تونقاللی آتشه دوشدوم.

وصال حسرتینده، آلیشدیم، پیشدیم،

منی‌ده یاندیران عشق اولدو له‌له.

 

بئش آد اؤیره‌تدیلر، سانی یئددیدیر،

ذکر ائتدیم بئشینی، خانی یئددیدیر.

پیمان باغلادیلار، کانی یئددیدیر.

منی‌ده یاندیران عشق اولدو له‌له.

 

گؤزلره وورولدوم اصلی باغیندا،

مجنونلا دولاندیم لیلی داغیندا،

نسیمی تک گولدوم دار آیاغیندا،

منی‌ده یاندیران عشق اولدو له‌له.

 

حق منی دوزگون ـه یارادیب عاشق،

قلبینده سئوگینی، تؤره‌دیب صادق.

ان شاء الله کی اولام بو پیره لایق،

منی‌ده یاندیران عشق اولدو له‌له.

 

هر کس عاشیق اولوب فانی دونیادا،

معشوقا چاتماییب پیشمه‌میش اودا.

«مراد» اود ایچینده چاتیب مرادا،

منی‌ده یاندیران عشق اولدو له‌له.

دوز اولسون

مهندس محمدباقر باقری (ارکین)

 

دکتر صدیق ساغدی هنوز قالیری،

او تبریزه هله ا‌یشیق سالیری.

کتاب اوسته گینه کتاب قالیری،

          او باسواد بیر کیشیدیر، بیر عارف،

          یازیر شهره دایرة‌المعارف.

 

سنین عمرون گؤروم اوستاد یوز اولسون،

قوی بودا بیر مثل اولسون سؤز اولسون،

هر تبریزلی «دوزگون» کیمی دوز اولسون.

          صداقتین نثار ائتسین تبریزه،

          گول چیچک دسته‌سیله گلسین بیزه.

 

دیریلیگینده من قدرینی بیلدیم،

زمانه‌نین توزون اوزوندن سیلدیم،

گؤی گؤزونه باخدیم سئویندیم گولدوم.

          سنه بخش ائده‌رم هر نه واریمی،

          الیمدن وئرمه‌رم سن تک یاریمی.

 

 

بیر آدین دوزگوندور بیری صدیقدیر،

بوتون تبریزلیلر سنه رفیقدیر،

«ارکین» سنه رفیقدن ده شفیقدیر.

          سنین بیرجه اشاره‌نله قاچارام،

          قاپیلاری قاباغیوا آچارام.»

نوشتن دیدگاه


تصویر امنیتی
تصویر امنیتی جدید