«تورپاق قوخوسو» نشر اولدو

حبیب ساهر، بولود قاراچورلو سهند، علیرضا اوختای، حسین دوزگون کیمی شاعرلرین شعرلریندن سئچمه‌لر سعید موغانلی و یاشماق نشریاتی‌نین فعالیتلرینده چاپ اولموش قیمتلی اثرلردیر.

حبیب ساهردن «یانان یاشیل»، علیرضا اوختای‌دان «ایشیق»، بولود قاراچورلو سهنددن «قارداش آندی»، و حسین دوزگون‌دن «تورپاق قوخوسو» شعر کیتابلاری بو انتشارات طرفیندن ایشیق اوزو گؤردو. بو گونلرده «تورپاق قوخوسو» 300 صحیفه‌ده و حسین دوزگونون یوز نئچه قطعه شعرلری ایله چاپ اولدو. کیتابین مقدمه‌سینی و بیر نئچه شعرینی تقدیم ائدیریک:

«سایین حسین دوزگون آدی، بیزه کلاسیک ادبیاتیمیزین قوروقچوسو کیمی تانینمیشدیر. اصلینده دکتر حسین محمدزاده صدیق دئیه بیر عمر درس کلاسیندا اوتوروب، و یا کلاسیک و عرفانی ادبیاتیمیزین آراشدیریجی‌سی و ادبیات تاریخیمیزین و آذربایجان دیلچیلیگین اوزمانی کیمی تانیدیغیمیز سایین اوستادین گنجلیگینین ایلکین دووروندن باشلایاراق شعر یاراتماسی بیر آز گیزلین قالمیشدیر.

گونوموزه کیمی یوزدن آرتیق، ادبی- بدیعی- تاریخی - تدقیقی اثرلری تورک توپلوموندا ایشیقلاندیران قوجامان یازارین آرا - سیرا شعر مجموعه‌لری ده ایشیق اوزو گؤرموش، آنجاق بؤیوک آذربایجان کلاسیک‌لرینین او جمله‌دن (فضولی، نسیمی، نباتی، معجز، شیروانی و . . . ) کیمی‌لرین، اوستادین امه‌یییله ساهمانلانمیش سسانباللی اثرلرینین آراسیندا آرتیق گؤره چارپمامیشدیر.

اوزون- اوزادی دانیشمادان بیزه و بیزیم نسله دوشن بورج، ادبیاتیمیزین اؤزه‌للیکله ده چاغداش شعریمیزین بوتون الوانلیغینی حاضیرلاییب، نشره یئتیریب و گؤز اؤنونده اوخوجولارین قضاوتینه قویماقدیر.

حسین صدیق کیمی بیر سیرا اوجامان آراشدیریجی‌لار کئچمیش ادبیاتیمیزین اؤرنک‌لرینی بیزه چاتدیرمیشلارسا، بیزده چاغداش ادبیاتیمیزی (چاغداش شعریمیزین آتاسی حبیب ساهردن، سهند، اوختای، سحره و مرقاتی‌دن قاراچایا و لوایی‌یه کیمی) و داها گنجلیگین یاراتدیقلارینی یایینلاییب، دونیایا پای وئره‌جه‌گیمیز باریش توپلولارینی گووه‌نه- گووه‌نه هنر انگینلیگینده ایشیقلانیراق.»

999

 منیم تورپاغیمدا چایلاقلار توتغوندور،

آمما دوغورماز دگیلدیرلر.

گئجه- گۆندۆز آخیرلار

آخماجا سایاغی

یورغون گؤزلریله

گؤیلره باخیرلار

سئیر ائدیرلر هر یانی

        اولدوزو، آیی،

        دره‌نی، داغی . . .

 

منیم تورپاغیمدا دنیز سوسغوندور

سیلاحلاری دا

قوینوندا یوخ، الینده یوخ،

        آلتیندا ساخلیر.

گاهدا اؤزۆن گؤسته‌ریر

کور اوغلونون آتی

        دنیزدن چیخمیش کیمی.

خیالدا ایسه گؤرۆنۆر

        بابکین قوشونو گلیر

همده فاتحانه

        دۆشمنی ییخمیش کیمی.

 

منیم تورپاغیمدا چایلاقلار توتغوندور.

آمما دوغورماز دگیلدیرلر.

دنیزه آخیرلار،

        هر گئجه- گۆندۆز.

هر داملادا

        999 نۆطفه

             دنیزه تؤکۆلر.

ختمی گولو

هله سؤیلنمه‌میش شعریم جوشماقدا

اوره‌ك سؤزلرینی هانسی بیر شاعـر،

یازا بیلمیش،

کی من ده یازیم؟

گولون یارپاغیندا، اوره‌ك تئلینده،

چیچگین عطرینده،

اوخویا بیلرسن

بو شعریمی سن.

گئجه آتلی‌‌سی‌نین قارانقولوقدا

آتی‌نین توزونو سئیر ائده بیلسن،

اوجا شمشاد قدّی

یئره دوشنده،

اونون طرفینه

سن گئده بیلسن،

هله یازیلمامیش شعریمی اوندا،

اوخویا بیلرسن،

بلکه، دئییرم.

تبریزده قویلانمیش

هله سؤیلنمه‌میش شعرلریم منیم.

گئت گز «‌‌حسینیه»‌ مزارلیغینی،

بیرجه گول بیته‌جک آقابابامین

باشینین اوستونده.

بیر ختمی گولو.

او، منیم

هله سؤیلنمه‌میش شعریم اولاجاق!

تبریز یوللاریندا - ص 74.

ابدی حیات

همیشه‌لیک، ابدی بورجلویام سنه بیلیرم

وطن!

بو بورجو ادا ائتمگه توانیم یوخ

منیم کی جانیم یوخ

کی او ابد اولسون!

سن ای منیم ابدی اومدوغوم آنا یوردوم

بوتون اومودلاریمین قایناغی

ترانه‌سی‌سن،

اورکده اکدیگیم هر بیر گولون‌ده دانه‌سی‌سن،

دیلک فسانه‌سی‌سن.

منیم اؤزوم ده گؤزوم‌ده سنه نثار اولسون!

سنین بؤیوک گله‌جک -

اعتبارلی شانلی گونون،

همیشه وار اولسون!

همیشه‌لیک، ابدی بورجومو منیم، تبریز!

قبول ائیله‌گیلن،

قوی یاواش - یاواش اؤده‌ییم.

اؤزوم،

هم اولادیم

و احفادیم،

تورونلاریم، نسیلیم،

همیشه‌لیک - ابدی اعتبارلی گونلرینه،

بورجوموزو،

قوی یاواش - یاواش اؤده‌یک،

بیر به بیر وطن یولوندا گئده‌ک.

 

وطن!

بو بورجو ادا ائتمگه

بیزه مجال گل وئر...

تبریز یوللاریندا - ص 36.

آیدین اوفوق

احمد شاملودان ترجمه.

گؤیرچینلریمیز بیرگون تاپیلار

گؤزللیک‌‌‌، محبت الیندن توتار‌‌‌.

 

اؤپوشدور ان کیچیک نغمه اوگون‌‌‌، باخ‌‌‌.

انسانلار

بیر - بیره

قارداشدیر آنجاق‌!

داها باغلامازلار ائو قاپیلارین

قیفیل ناغیل اولار

کؤنول ایسه بسدیر

دیریلیگه اوگون.

اوگون معناسی هر سؤزون سئومکدیر،

سون سؤزون چین‌‌‌، سؤزلر دالی گزمزسن.

اوگون آهنگی هر سؤزون حیاتدیر،

سون شعریم چین من‌ده‌‌‌، قافیه دردینی چکمرم اصلا‌‌‌.

بیر گؤزل نغمه‌دیر اوگون هر دوداق،

ان کیچیک نغمه ده اؤپوشدور آنجاق!

همیشه‌لیک گلسن سن اوگون اگر،

گوزه‌للیکله بیر اولسا محبت‌‌‌،

اوگون کی بیرده بیز گویرچینلره‌‌‌.

یئنه سرپک دنه‌‌‌...

 

منسه اوگون اوچون اینتظار دایام

حتی اگر بئله داها اولمایام‌‌‌...

کیچیک شعرلر - یای 1347 تبریز - ص  60 .

یادا سال!

سن ای داغ!

سهند، ای یوز مین ایللر قبله‌گاهی، ای اولو معبد!

سینه‌نده لاله‌لر بیتمیش،

سولار آخمیش، سئل آتلانمیش،

بوروقلاریندا آهولار جیلولانمیش،

بیر چوخو ایتمیش.

آنالار یاسا باتمیش، درده قانلانمیش،

چادرلار، ائولر اودلانمیش.

یادا سال، گل!

 

سهندیم،

ای اولو معبد!

فضولینی گؤروبسن سن،

دده‌م قورقود اؤتوب سندن،

و هم زردوشت پیغمبر،

نباتی‌نی یادا سال گل!

 

سهندیم!

ای اولو معبد،

قارانلیقلاردا آتلانماغی گؤرموش‌سن،

آنالار قلبی ایچره داغی گؤرموش‌سن.

شهیدلر قانی آخمیش دامنیندن هر گئجه گوندوز،

نه‌لر سن گؤرموسن داغیم،

نه‌لر،

بیر یادا سال،

گل باخ!

سینه‌ن حکمت بولاغی،

تجربه قایناغی،

تاریخین دیاری،

یوردومون دفتر کـتابی!

یادا سال، گل!

 

سهندیم،

ای اولو معبد!

ائلین تاریخینی دانماق،

نه پیس ایشدیر!

کیشی‌دیرمی ائلین چاکر ائد‌ن هر ناخلف؟

نه دؤوراندیر کی یالتاقلار سنین سینه‌نده آت چاپسین؟

سهند، ای یوزمین ایللر قبله‌گاهی!

سؤیله تاریخه،

شهادت وئر کی: «‌‌پیس ایشدیر،

ائلین هر ناکسه چاکر نؤکر سانماق.»‌

یادا سال گل، خلف اولادی،

هم ده ناخلف قارنین قاداسین،

یادا سال گل!

باشیوین یوزلر بلاسین.

 

بوگون ‌سینه‌نده اوتلاقلار،

سورو سئیرانگاهی اولموش.

چوبانلار نی چالیر بوردا.

سرین یایلاقلاریوا ائل اوبا دولموش،

جوانین یورد سالیر بوردا،

قوجان‌دا ذؤوق آلیر هر دم.

نه‌دیر غصه، نه‌دیر غم، هئچده من بیلمم،

ائلین قوربانلیغی سایسیز حسابسیز دیر سنه.

قبول ائیله بو شن گونده،

کئچن گونلرینی،

بیر – بیر،

یادا سال، گل!

 

سهندیم،

ای اولو معبد!

اوزاقدان بیر چوبان سسلیر منی ده،

دئییر:

شاعـر!

بو یوردون قهرمانی، سؤز بیلن انسانی واردیر، بیل!

وطن خالی دگیل اصلا،

خلف اولادی دوزگوندن.

تبریز یوللاریندا – ص41 – 1380.

 

نوشتن دیدگاه


تصویر امنیتی
تصویر امنیتی جدید