فداکار حکیم شاعریمیزین ایتگیسی

من، «شیمشک» تخلّصی ایله تورکجه شعرلر یازان «دکتر سید محمد حسین مبیّن» آدلی  تبریزین بابا باغی فداکار حکیمینی 1368 ـنجی ایله قده‌ر تانیمازدیم. همین ایلده ایل بایرامی‌نین بیر گونونده گؤروشونه گئتدیگیم رحمتلیک «حمید ملازاده»، نشر ائتدیگی «به یاد شهریار» آدلی کتابی منه گؤستردی. کتابی آلدیم، واراقلادیم. بئش یوز صحیفه‌یه یاخین بو کتابدا، شیمشک، شهریار حاققیندا شعر یازان یوز نفردن چوخ شاعرلرین تورکجه شعرلرینی توپلامیش، اؤزونون یازدیغی ادیبانه بیر گئنیش اؤن سؤز ایله نشره حاضیرلامیشدی.

مرحوم ملازاده‌دن اونون حاققیندا معلومات توپلادیم، تلفن و آدرسین آلدیم، زنگ ائتدیم و صاباحی گون عائله‌م ایله برابر، ائوینه بایرام گؤروشونه گئتدیم. تانیشلیغیم بورادان باشلادی.

سونرالار دفعه‌لر گؤروشلریمیزده، اونون شخصیتی و ادبی یارادیجیلیغی ایله آرتیق‌راق تانیش اولدوم. اوشاقلار ادبیاتی ایله علاقه‌دار دالبادال گؤزل شعر مجموعه‌لری او جمله‌دن اوشاق کتابلاری آراسیندان «آجیل چتریم» و «قوش یوواسی» کتابلارینی و «جوذاملی سارای» عنوانلی بیر منظومه یازدی و نشر ائتدی.

اونون «به یاد شهریار» آدلی کتابی ایکی فارسجا و تورکجه بؤلومدن عبارتدیر. فارسجا بؤلومون باشیندا مرحوم روشن ضمیرین بیر مقاله‌سی و رحمتلیک یحیی شیدانین یئنه‌ده فارسجا یازدیغی اؤن سؤز و یئرلشیر. اوندان سونرا شهریار حاققیندا یازیلان شعرلر گلیر. کتابین اساس حصه‌سی اولان تورکجه بؤلومونه مرحوم شیمشک اؤزو مقدمه یازیبدیر.

من، بو کتابین تورکجه حصه‌سینه یازدیغی اؤن سؤزو، ائله مرحوم ملازاده‌نین دوکانیندا اوخودوم. بوگون بیر داها اونو مرور ائدرکن، شیمشکین اورک چیرپینتیلاری و اضطرابلارینی آپ آچیق حس ائده بیله‌ریک. او، اؤز مقاله‌سی‌نین باشیندا دئییر:

«اوستاد محمد حسین شهریار فارس ادبیاتی‌نین گؤرکملی سیماسی،‌ آذربایجان تورک ادبیاتی‌نین پارلاق اولدوزو، آذربایجانلی‌لارین و بوتون تورک دیلینده دانیشانلارین شرفی و افتخاریدیر.»

بو سؤزلری یازان شیمشک اؤزوده ثمره‌لی حیاتی بویوندا دیلیمیزی بیر ائل ناموسو کیمی قوروموش و شاعرلیک قابلیتینی، ائللری ایچون صرف ائتمیشدی. من اونون ایتگیسینی آذربایجان یازیچی و شاعرلرینه تسلیت عرض ائدیرم و اومیدوارام، نشر اولمامیش اثرلری توپلانیب زمانه حادثه‌لریندن قورونوب ساخلانسین. الله اونا غنی غنی رحمت ائله‌سین.

 

دکتر ح. م. صدیق

تهران - 7 مهرماه 1394

 

نوشتن دیدگاه


تصویر امنیتی
تصویر امنیتی جدید