دکتر صدیق: یئنی شعر حبیب ساهرین استعدادی‌نین تحفه‌سیدیر

دکتر ح. م. صدیق قاراداغ شاعری طیب قیطران‌پور (یانار قاراداغلی)نین خداآفرین ادبی انجمنی طرفیندن چهارشنبه گونو ساعت 6 -دان 8 ـه قده‌ر قورولان کتاب تؤره‌نینه قاتیلدی و صحبت ائله‌دی. او اؤز سؤزلرینده دئدی:

«بو جوان شاعر و تدقیقاتچی‌نین یایینلادیغی اوچ شعر مجموعه‌سی، بیر مقاله‌لر توپلوسو و تدقیقی اثر اولان «ادبیاتدان بیر آز اویانا» حجملی مجموعه‌سی منیم ماراغیمی چکمیشدیر. من اونون اثرلرینی مثبت قارشیلاییرام و اونو تحسین ائدیرم.»

 

دکتر ح. م. صدیق یانار قاراداغلی‌نین یئنی شعرلری حاققیندا‌ دا دانیشارکن، دئدی:

«هر داهی شاعر اؤز زمانه‌سینده یئنی شعر یازمیشدیر، مثال اوچون نسیمی اؤز عصرینده، فضولی ایسه یئنه‌ده اؤز زمانه‌سینده یئنی طرز و شیوه‌ده شعرلر یازمیشلار. چاغداش فارس و تورک ادبیاتی ایسه ایراندا، 50 ایللیک آذربایجان مقاومت شعری تمثیلچی‌سی اولان حبیب ساهره بورجلودور. او اؤز نبوغ و استعدادی سایه‌سینده هم فارس و هم تورکجه‌میزه یئنی شعر تحفه ائتمیشدیر. دئمک اولار کی چاغداش تورک و فارس یئنی شعری، حبیب ساهرین نبوغ و استعدادی‌نین تحفه‌سیدیر. البته اونون گؤروشونده یئنی شعرده موسیقی، وزن، ریتم، آهنگ و قافیه اولمالیدیر، لاکن بونلار تزه بیر قایدا قانون اساسیندا گلیر و کلاسیک قایدالار ایله چوخ فرقلی اولور.»

دکتر صدیق سونرا یانار قاراداغلی‌نین تدقیقات قابلیتینه اشاره ائدیب دئدی:

«یانار گنج نسل آراسیندان چیخان، ذرویه چاتماق نیتی ایله اوخویوب اؤیره‌نن بیر گنج دیر. اونون دانشگاهی تحصیلاتی دا واردیر و «ادبیات» ساحه‌سینده «فوق لیسانس» درجه‌سی آلمیشدیر، ان شاء الله دکترا درجه‌سی‌ده آلار و اؤز ملتی، ائلی و اولوسو اوچون داهادا یارارلی اولار. اونون تدقیقات قابلیتی‌ده تحسینه شایاندیر. خصوصیله مقاله‌لر توپلوسوندا گلن آکادمیک سویّه‌ده یازدیغی ادبی تحلیللر منیم اوچون ماراقلی‌دیر. بیزیم نثر یازانیمیز آزدیر، او ایسه تدقیقی نثر ساحه‌سینده قلم چالماقدادیر.»

یانار قاراداغلی‌نین نشر اولا کتابلاری ادبیاتدان بیر آز اویانا، اوچ شعر مجموعه‌سی و مقاله‌لر توپلوسو آدلی کتابلاردیر.

 تجلیل از یانار قاراداغلی - قیطرانپور

تجلیل از یانار قاراداغلی - قیطرانپور

تجلیل از یانار قاراداغلی - قیطرانپور

تجلیل از یانار قاراداغلی - قیطرانپور

 

نوشتن دیدگاه


تصویر امنیتی
تصویر امنیتی جدید