تورکجه دیل بیلگیسی- دؤردونجو درس

شعر دئييله‌بيلن هر اثرين أوچ اؤزلليگي اولماليدير: بيچيم، اؤلچو، اوياق. بو درسده «اؤلچو» حاققيندا بيلگي وئره‌جه‌ييك.

شعر اؤلچوسو هر ديلده، او ديلين قورولوشوندان دوغار. توركجه‌ميزين اكلمه‌لي ديل اولودوغو ايچون، اسكي شعر اؤلچوسوده «هجا اؤلچوسو» اولموشدور. بورادا هجا اؤلچوسو حاققيندا دانيشاجاغيق.

هجا اؤلچوسو ان اسكي شعر اؤلچوسودور. اونون اساسي مصراعلارين بارماق ساييسي ايله مساوي اولمالاريدير. كئچميشده توركجه هجا اؤلچوسونه «وزن بنان» (= بارماق اؤلچوسو) دئيرميشلر. هجا اؤلچولرينده، آتالاريميز ايكيلي اؤلچودن اون آلتيلي اؤلچويه كيمي شعر يازميشلار:

 

ايكيلي أولچو: 

دلي دولو / آخچا بوخچا

آز گئتديم / أوز گئتديم

داغ تپه / دوز گئتديگ

 

دؤردلولر:       

علي علي / اولمادلي

 

بئشليلر:

ياراوره‌گيم يار

گؤركي نه‌لر وار

خلقين ايچينده

بيزه گولر وار

* * *

هر كيم مردانا

گلسين ميدانا

گودمه‌سين جانين

كيمده هونروار.

 

آلتيليلار:

(3+3)     

منيم بو ياريمي

گؤرمگه‌كيم گلير

ذوق ايله صفالار

سورمگه‌كيم گلير

* * *

 ياريمين اؤزونو

ساؤرم گؤزونو

 مبارك اوزونو

گؤرمگه كيم گلير

* * *

ياريمين ائللري

اوزاقدير يوللاري

آچيلميش گوللري

درمگه كيم گلير

* * *

آز سويله / اؤز سويله

 

(2+4)   

داغلار دومان اولدو

چايلار چيمن اولدو

گؤرمه‌ديم من ياري

حاليم يامان اولدو

 

يئدديليلر:

(3+4)     

عزيزيم هاراييندان

ائل ياتماز هاراييندان

گونده بير كرپيچ دوشور

عؤمرومون ساراييندان

 

(4+3)     

آلما وئرسم آلمازسان

سن آلمادان قالمازسان

هانسي باغين گولوسن

اييله‌ديكجه سولمازسان

 

سكگيزليلر:

بؤلگولري (4+4)، (3+5)، (6+2)، (2+6)، (3+3+2) دير.

گئدين دئيين خان چوبانا

گلمه‌سين بو ايل مغانا

گلسه قالار ناحق قانا

آپاردي سئللر ساراني

 

دوققوزلولار:

بؤلگولري (6+3)، (3+6)، (4+5)، (5+4) دير.

يات آرزو قيزيم بئشيگينده

قوي آنان دورسون كئشيگينده

 

اونلولار:            

باخ بوياريمين آلاگؤزونه

سحر گونشي دگميش اوزونه

ظولمون كمري باغلي بئلينه

ستم خنجرين آلميش الينه

 

اون‌بيرليلر: (6+5)، (4+4+3)، (4+7)، (7+4)، (5+6)

اورداكي ديل آغيز سؤزدن اوسانار

سؤروشون مطلبي اللر سؤيله‌سين

دوداق دانيشارسا اود توتار يانار

گركدير زخمه‌لر تئللر سؤيله‌سين

-------------------------

تهرانين غئيرتي يوخ شهرياري ساخلاماغا

گئديرم تبريزه قوي ياخشي يامان بلله‌سين

 

اون ايكيلي‌لر:

(6+6)   

بير سون باهار آخشامي ساحيللرده‌يم

غملي بير هيكل‌كيمي قايالاردا من

داغينيق ساچلاريمدان پرواسيز اسن

روزگارلارين الينده قيريق بير ني‌ام

* * *

دنيز منه خاطيرلار كيمسه‌سيز ليگيمي

گؤز ياشلاريله دوشر دالغالار قوما

قورو بير يولدايام من خسته روحوما

هركيم يابانجي، كيمدن سوروشوم كيمي؟

* * *

دومانلارلا اؤرتونن بير دنيز كيمي

جانلانماقدا ان حزين دالغالار منده

گؤزله‌ييريك يوواني ايندي باخچادا

من كيمسه‌سيز، آغاجلار كيمسه‌سيز كيمي

* * *

(4+4+4)           

اي آتالار يوردداقانا بولاشانلار

اي مينلرجه تك باشينا يئرييه‌نلر

اي داؤلرين لشكريني سوروينلر

اي مراما قان ايچينده اولاشانلار

* * *

اون اوچلولر:

بيز كيملريك بيز آلتايدن گلن ائللريك

آذربايجان تورپاغيندا جوشان گؤللريك

* * *

ايللردير كي بير قيلينجيم قالميش قينيندا

كيمسه‌سيز دؤرد يانيمدا بير ديوار كيمي

مضطربم بو ديوارين بير طرفيندن

شفقتينه اينانديغيم بيري واركيمي

 

اون دؤردلولر:

بيركز اوزونو گؤرن عؤمرونجه اونوتمايا

تسبيحي سن اولارسان او، آيري دين توتمايا

من سني ساؤديگيمه بهاديلرلر ايسه

ايكي جهان مولكونو وئريب بها بيتمه‌يه

گول و ريحان قوخوسو عاشيق ايله معشوقدور

عاشيق معشوقه‌سي هئچ گؤزوندن گئتمه‌يه

* * *

قاياليقلاردا بير گنج اؤلدوگو گون بو كندين

ائلي سني قارانليق رؤيالاريندا گؤرموش

اي ياد كؤنلوموزدن چيخمايان آفت سنين

ساؤمه‌ديكلرين دگيل، ساؤديكلرين اؤلورموش

* * *

اون بئشليلر:

من ايتيرديم، من آرارام، يار منيمدير كيمه‌نه

گاه گئدرم اؤز باغيما گول دره‌رم كيمه‌نه

نسيمي‌يه سوردولاركي يارين ايله خوش موسان

خوش اولاييم خوش اولماييم اويار منيم كيمه نه

(3+4+4+4)

من ان حقير بير انساني قارداش بيلن بير روحام

منده اسير ياراتميان بير تانري‌يا ايمان وار

 

اون آلتيلي

نئديم من بو كؤنول ايله منيم ايله بئله دورمار

معشوق اوزون گؤردو مگر اؤيوتله‌ييب اؤيود آلماز

كؤنلوم داهي جانيم داهي ال بير ائتدي اول ايكيسي

يوزمين يونسدن فراغت دوست اوزوندن گؤزون ايرمز

* * *

غريب بولبول اوزاقلاردا اوخور الله دئيه – دئيه

آيريليق اؤلوملردن بتر الله دئيه  - دئيه

* * *

آذر اوغلوم سنين آدين بو دونيادا ان خوش‌سسدير

سنين فيكرين عاغلا گلن هر كلمه‌دن مقدسدير

سنين دويغون اوركلرين ان مبارك ساؤدا سيدير

سنين دردين بئيينلرين ان آتشين عنقاسيدير

سن فريادا باشلاياندا طمع، غرض بوتون سوسار

محبت‌لر سنين فطري حقوقونا يوللار آچار

ياناقلارا آجي وداع گؤز ياشلاري آغي تؤكر

بئشيك‌لره معبدلره هربوجاغا ياسلار چؤكر

* * *

من بو اوزون ساحيللرده دوروب فيكره دالماميشام

گؤزل تبريز ائللرينده‌بير گون قوناق قالماميشام

نوشتن دیدگاه


تصویر امنیتی
تصویر امنیتی جدید