گوللر آچاجاق- رضا همراز

نام اثر: گوللر آچاجاق؛

تهیه و تنظیم:رضا همراز تبریزی

در ميان مجموعه‌هايي كه از اشعار استاد توسط صاحب قلمان تنظيم و نشر شده است اين كتاب اهميت شاياني دارد. آقاي «رضا همراز» نويسنده‌ي تبريزي به شيوه‌ي خاصي با توجه به دوران‌ مختلف فعاليت ادبي استاد توانسته است مجموعه‌اي از اشعار اين دوران‌ را گردآوري و تحت نام «گل‌ها شكوفا خواهد شد» انتشار دهد و مقدمه‌اي زيبا نيز بر آن نوشته و برخي لغات را در انتهاي كتاب توضيح داده است.


 

ادبیاتیمیز و كۆلتۆرۆمۆزه گئجه- گۆندۆز یورولمادان، جان‌دان مایا قویان‌لار ایچینده شبهه‌سیز كى، استاد دکتر حسین صدیقین پایی هامی‌‌دان چوخ اولماسادا‌، چوخ‌لاریندان آرتیق اولموشدور.

مبالغه‌سیز دئسه‌ك، اونون چالیشقان‌لیغی تانیدیغیمیز ادبیات‌چى و شاعرلر ایچره تاى‌سیزلیغی آپ- آیدین دیر.

او، ایسته‌ر شاعر، ایسته‌ر قزئته‌چى، ایسته‌ر ترجمه‌چى و ایسته‌رسه باش رئداكتور اولدوغوندا آغیر وظیفه‌لر داشیمیش‌دیر.

دکتر صدیقى، یاراتدیغی اثرلرینه گؤره بیر شاعر، عالِم، بیلگین ادیب و تاریخ‌چى كیمى تانیریق. فكریمیزجه او، ائلى‌نین یانیندا همه‌شه باشی اوُجادیر. نییه كى او، اؤز وطنداش‌لیق بورجونو ائلى‌نین و وطنى‌نین قارشی‌‌سیندا، اۆست سطرلرده دئدیگیمیز كیمى دؤنه- دؤنه آغیر و تَهلكه‌لى زمان‌لاردا اؤده‌ییب‌دیر.

شاعر، استاد حسین دۆزگۆن یا‌زیچی‌‌لیق عَرَفه‌سینه آیاق قویدوقدا، شاه و اونون فكرداش‌لاری‌نین ایچ اۆزۆنۆ قات- قات آچیب گؤسته‌رمه‌کده و اونلارین ظاهرده گیزلى ماهیت‌لرینى افشا ائتمه‌كده دوغرودان دوغروسو شهامت و جسارت گؤسته‌رمیش‌دیر:

.... قیزیل گۆل دوغاندا منى یاد ائله،

فعله‌لر قالخاندا منى یاد ائله.

انقلاب اولاندا منى یاد ائله،

آى گؤزه‌ل انسانیم اونوتما منى ....

 

اونون شعرى اولدوقجا ساده، آنلاملى و معنا باخیمیندان زنگین و فورما جهت‌ده‌ن ایسه اۆره‌گه یاتیم‌دیر. دوقتورون اثرلرى‌نین بیر چوخوندا، یاشادیغی گنج چاغ‌لارداكى دُورون اجتماعی نقصان‌لارینی وار گۆجۆ ایله قورخمادان اۆزه چكمك‌ایله، مبارز شعریمیزین سارسیلماز اراده‌لى شاعر‌له‌رى‌نین سیرالاریندا دایانمیش‌دیر.

قفسه سالیب‌لار منیم تك شئرى،

من قیرا بیلمیرم تكجه زنجیرى.

قورخورام او زمان هایلایاسان كى،

قارداشین اولمایا داها داى دیرى.

 

استاد، اؤز ائلینه خدمت گؤسته‌رمه‌گى، سو و هاوا كیمى گه‌ره‌کلى بیلیر و بوُنا گؤره بوگۆن 56 یاشیندا اولماغینا باخمایاراق، آتالار دئمیش‌کن سو دوُرار، او دوُرماز. هابئله اونون شعرلرینده، انسان سئوه‌رلیگه ساری یؤنه‌له‌ن فكر و افاده اولدوقجا ماراق‌لی‌دیر.

شاعرین شعرلرینده، آذربایجان یا خود تۆرك‌لرین داهی شاعرلرى‌نین یئرى گلمیش‌كن آدی آپاریلیب و اونلارا شعرلر حصر ائدیلمیش‌دیر. اؤرنك اولاراق نسیمى شرفینه بئله یازیر:

سرّینى عالمده پنهان ائیله‌میش،

عالمى‌ هم حق هم انسان ائیله‌میش.

آلتی یۆز ایل قاباق عصیان ائیله‌میش،

 نسیمى، نسیمى، طغیان ائیله‌میش.

 

اَلده اولان شعر توپلوسوندا، انقلاب‌دان اوّل‌ده‌كى شعرلرینده بول- بول كنایه‌لر و استعاره‌لر ایشلنمیش‌دیر كى، یئرینده چوخ ده‌رین معنالی و گۆج آپاران ایدى‌لر. باخین: سحر آچیل، گئجه گئت، باهار اولاجاق، قارا قیش، گۆللر آچاجاق و ... اونلار بو كیمى اۆستۆ اؤرتۆلۆ سؤزلر كى، شاعرین اته‌گینه چؤره‌ك‌ده قویموشلار.

بؤیۆک عالِم، اؤز طبعینى هَر ژانئرده سینامیش‌دیر: غزل‌ده، قوشمادا، سربست شعرده، پوئمادا، گَرایلى‌دا و باشقا قالیب‌لاردا. جالب دیر كى شاعر بو سیناق‌لاردا اۆست- اۆست‌ده موفق اولموشدور. باخین شیخ محمد خیابانى‌یا عاید قوشولان منظومه‌یه كى ادبیاتیمیزدا چوخ ده‌یه‌رلى، دقّته لایق و اؤنه‌ملى ایش‌لردن دیر و اوندا شهید خیابانى‌نین آنادان اولماسیندان جان دوداغیندان چیخانا كیمى گؤزه‌ل، آخیجی و علمى شكل‌ده نَظمه چكیلمیش‌دیر. باخین:

ایگیرمى ایكینجى گۆن، شهریورده،

ماتم اؤز قانادین سَرمیشدى یئره.

بیر داها عاشورا تكرار اولوردو،

بیر باغری قان لاله یئنه سولوردو.

بیر باشقا شهیده مزار قازیلدی،

اونون باش داشینا بئله یازیلدی:

عشقین معراجینا شهید قاووُشدو،

مَلَكى‌ده اؤتدۆ، گؤیدن ساووُشدو،

فضیلت شهیدى اوچدو گؤیلره،

جسدى اورادا سَریلدى یئره.

عقیده اوغروندا، مرام اوغروندا،

شهید اولدو حسین (ع) موولاسى كیمى،

آغریسی آغریدیر منیم قلبیمى ...

 

پروفسور صدیقین ا‌ن چالیشقان چاغ‌لارینی اۆچ فصله بؤلمه‌ك اولار:

1- گنج چاغ‌لاری

بوُ دُورده، استاد آردیجیل مقاله‌لر یازیب یا ترجمه ائدیب آز- آز چاپا بوُراخذیغینا گؤره اوگۆنكۆ تۆرک‌چۆلۆیۆن مدافعه ائده‌نلرى‌نین ا‌ن تانینمیش‌لاریندان و باشدا گئده‌ن‌لریندن ایدى.

2- انقلاب چاغ‌لاری

بو دؤنه‌ده، دوقتورون، ژورنال چیخاریب باشقالاری‌‌نین شعر‌لرینى توپلاییب چاپا بوراخماق‌لا ادبییاتیمیزدا فایدالی ایزلرى و دانیلماز رول‌لاری اولموشدور.

3- سون بئش- آلتی ایل

بو ایل‌لرده، استاد، بیر چوخ گنج‌لرله علاقه ساخلاییب اونلارین اَل‌لرینده‌ن توتوب، اونلارین چالیشمالاری‌‌نین چیچك‌لنمه‌سینده چوخ گؤركملى رول اوینامیش‌دیر. او، هفته‌نین بو باشی تبریزده، او باشی تهران‌دا، زنگان‌دا، اوُرمودا، اصفهان‌دا و نه بیلیم‌ ها‌رادا اوزون- اوزاق یول‌لاری یورولمادان گئدیب دیل كلاس‌لاریندا شركت ائدیب، 40 ایل‌د‌ن آرتیق آلده ائتدیگى بیلگى‌لرى اؤز طَلَبه‌لرى ایله پاى‌لاشیر. بو گئت- گل‌لرین آساسیندا، اونون بیر چوخ گنج‌لرین اثرلرى‌نین یاییلماسیندا ا‌رده‌ملى رولو اولموشدور.

بیز بو اثرین توپلاماسی‌‌نی اؤزۆمۆزه بیر بورج بیله‌ره‌ك اونو بو شكل‌ده اؤده‌یه بیلدیك. حال ‌بوكى بو شعر توپلوسونو باشقا بیر كیمسه توپلاسایدی یقین كى آیری بیر طرزده یئكون‌لاشدیراردی. سون گۆن‌لرده، ادبى دوستوموز، یازی‌چی و تنقیدچى- بهروز ایمانى‌نین «سؤز سوراغیندا» آدلی كتابیندا استادین شعرلرینه عاید توخوندوقلارینا گؤره بیزیم ایشیمیز بیر آز ساده‌له‌شدى. بو معنادا كى، بیزیم بو اؤن سؤزده ذكر ائده‌جه‌گیمیز سؤزلرین بیر چوخونون اورادا اولدوغونا گؤره، تكرار اولماسین دئیه یازماغیندان واز كئچدیك. شعرلرین آچیق‌لامالارینی آختاران‌لار او كتابا مراجعه ائده بیلر‌لر.

سؤزلریمیزین سونوندا بونودا آرتیرمالی‌‌ییق‌كى، بلكه‌ده گۆللر آچاجاق كیتابى، استادین شعرلرى‌نین توپلانماسیندا بیر گیریش اولاراق گله‌جك‌ده‌ دوغروداندا گوللر آچیب ادبیات باغچامیز دکتر صدیقین شعرلرى ایله داها عطیرله‌نیب گؤزه‌للنسین.

 

تبریز – 1380.

 

نوشتن دیدگاه


تصویر امنیتی
تصویر امنیتی جدید