معلم‌لیک و معلمین شأنی - محمد داوریار اردبیلی

محمد داوریار اردبیلی

بۆتۆن دُورلرده معلم آدی حرمت و احتراملا چکیلیب. چۆنکی دُورلرین، جمعیتلرین حقیقی معلملره همیشه جدّی احتیاجی اولوب. اصلینده، جهانشمول (قلوبال) دُور دگیشمه‌لرده، اجتماعی ـ سیاسی‌‌‌‌‌‌‌‌ یئنی‌لشمه‌لرده، ائله جمعیتین اؤزۆده مکتب، معارف سیستمیندن، معلمین یئتیشدیردیگی، تقدیم ائتدیگی نسیل‌لریندن، اونلارین کمیت و کیفیت وضعیتلریندن باشلانیر. اونا گؤره بؤیۆک ضیالیلاریمیز، داهی علم، مدنیت و صنعت آداملاریمیز مکتبه، معارفه، مقدس معلم امه‌گینه دائم یۆکسک قیمت وئریب، اونو جمعیتین اساس معنوی گۆج منبعی، مدنی حرکت وئریجی قوّه‌سی آدلاندیریب.

معلم آدی مقدّسدیر. معلم‌لیک پئشه‌سینه گلینجه ایسه، بو تکجه علم اؤیره‌دن، جوانلاری، انسانلاری علمین سرّلریندن حالی ائده‌ن دئمک ده‌گیل، معلم اؤز شخصی نمونه‌سی ایله، هامییا درس وئریر، عالی انسان شخصيتينی فورمالاشدیریر، بیر عُمر ايله نئچه عُمره اؤرنک اولور. ائله بیر شخص تاپیلماز کی، اؤز اوغورلارینی معلم‌سیز تصور ائتسین، شخصیتین فورمالاشماسی، معلومات قازانماسی و شعورلو اولماسی، هر انسانین حيات بویو بورجلو اولدوغو شخصیت وارسا، اودا معلم‌دیر.

معلم جمعیتین میزان ـ تره‌زی‌سی، انسان معنویاتی‌نین اؤلچۆ واحدی‌دیر. انسانلار بۆتۆن زمانلاردا معلم سؤزۆنۆ آغیر باتمانلا، بؤیۆک حرمتله و عزتله ده‌یرلندیرمیشلر. او همیشه جمعیتین دادی، تامی، مایاسی و یول گؤسترنی اولموشدور. اوشاق آیاقلاری یئر توتوب آددیم آتان دا، دیلی سؤز توتوب دانیشان آندان، معلم سؤزۆنۆن ایستی‌سینه ایسینمیش، مقدس‌لیگینه، اوجالیغینا ستایش ائتمیشدیر.

بیر نسلین معلمینه، اؤیره‌دیجی‌سینه چئویریله‌رک، سایسیز ـ حسابسیز شاگرد، طلبه، ائللريميزين معنویاتی‌نین اینجه‌لیکلرینی دویوب درک ائتمکدن اؤترۆ، معلم‌دن ناراحت کؤنۆللری اۆچۆن سئواللارینا جواب گؤزله‌ییرلر.

اوزون ایللردن بری آییق ـ ساییق قاراوولچو کیمی ملّی ـ معنوی و مدنی اجتماعی دگه‌ر‌لریمیزین کشیگینده دایانیب، کئچدیگی حيات یولو ایله جوانلارا نمونه اولان بؤیۆک انسان، شخصی قابلیتی و باجاریغی ایله اؤرنک اولان، بۆتۆن صحبتلرینده، مصاحبه‌لرینده، معروضه‌لرینده، محاضره‌لرینده ائللريميزين معنویاتی‌نین یۆکسک‌لیگینی ائله ایناندیریجیلیقلا، صمیمیتله، حقیقتلرله، مثاللارلا ائشیدنلره آشیلاییر کی هر کس عالِم ده، شاگرد ده، طلبه ده بو سؤزدن، بیر نصیحت آلیر، معنوی عالمینی زنگین‌لشدیریر.

بلی حسین معلم زحمته قاتلاشا ـ قاتلاشا، آجیلیغیندا شیرین‌لیک آختارا ـ آختارا، متفکر حياتی، عالِم حیاتی، نمونه اولا بیله‌جک بیر معلّم حیاتی یاشاییر.

نوشتن دیدگاه


تصویر امنیتی
تصویر امنیتی جدید