آغلی داغ (مقدمه دکتر صدیق بر آثار دیگران)

چاغداش شعریمیز گنجلیگیمیزین  دؤنمز مدنی حرکتیندن ایلهام آلیر و حقلی موباریزه‌لرییمیزدن قایناقلانیز. بو انگین مجموعه‌یه قاتیلان هر بیر سؤزاوستاسی ائل- اوُلوسوموزون یوکسک معنویت و مدنی وارلیغیندان دفاع ائتمگی اؤزنه وطنداشلیق بورجو حساب ائتمکده‌دیر. ائله بیر آذربایجان شاعیری تاپماق اولماز کی، حتّی دولایی یوللار ایله اولسون، شوونیسم طرفیندن تاپدالانمیش حقلریمیزی و ملی وارلیغیمیزین عزّت و عظمتینی قوروماسین. ایستر لیریک و تغزل، ایسترسه‌ده حماسی شعرلریمیزده، ایسترسه ساتیرا و طنز و ایسترسه‌ده مذهبی دوُیغولو عرفان حکمتی ایله دولو یارانان منظوم اثرلریمیزده، هر یئرده و هر زامان بو حس دوُیولماقدادیر.

بئله نظره گلیر کی، یارانان چاغداش شعر نمونه‌لریمیز، ایندی یه کیمی تاریخ بویونجا یارانان بوتوان ادبی شاه اثرلریمیز ایله موقایسه‌ده اوُلوسچولوق آرمانلاری داشیماقدا، تایسیز و نظیرسیز بیر مجموعه‌یه چئوریله جکدیر. بو نمونه‌لری علمی شکلیده و موعاصیر بیلیم طلباتینا اوُیغون نشر ائتمک، هامیمیزین بوینوموزدا بیر بورج کیمی دگرلندیریلیر. آرزوموز بودور کی چاغداش شعریمیز نمونه‌لری و شعر مجموعه‌لریمیز، رسمی حیمایتلردن اوُزاق اولمالارینا باخمایاراق لیجیمی و مطلوب شکلیللرده نشر اولونسون.

النیزده اولان شعر توپلوسو، یوُردوموزون گؤزللیک لرینی وصف ائدن و یئرلی یئرینده فضیلت و حکمت جارچیسی کیمی، یوکسک معنوی دوُیغولاری دیله گتیرن ائل شاعیریمیز «گولدورلو ولی» یه عائددیر کی موعاصیر تدقیقاتچی، تنقیدچی، یازیچی و شاعیریمیز آقای «گونئیلی»‌نین  عالیمانه دولیشچییلیگی ایله نشر اولونور.

من، بو اثرین یارانماسینی موبارک بیر حادیثه کیمی قارشیلاییرام  و اوخوجونو دعوت ائدیرم کی مجموعه‌ده یئر آلان معنویت هاله‌لرینی منیمسه‌یه رک، شعرلری دؤنه-دؤنه اوخویوب منیم‌ده منتدارلیقلاریمدا اؤزونو شریک و اورتاق حساب ائتسین.

منبع:‌شاه محمدی، ولی (گولدورلو ولی). آغلی داغ، تهران، 1381.

نوشتن دیدگاه


تصویر امنیتی
تصویر امنیتی جدید