عاشیقلار توپلانتیسینا گوندریلن ساو

عاشیقلارآذربایجان عاشیق یارادیجیلیغی، شفاهی و سؤزلو ادبیاتیمیزین بؤیوک بیر قولو ساییلیر. عاشیقلار عمومیتله گئنیش خلق کوتله‌سی ایچیندن چیخمیش ائل هنرمندلریدیرلر. هر بیر عاشیق خلقین ان سئویملی نغمه‌کاریدیر. خلقین تاریخ بویونجا مبارزه‌لرینی، هیجان و اضطرابلارینی، اورک چیرپینتیلارینی، سئوگیسینی و محبتینی ترنم ائدیر. آذربایجان کندلرینده ایندی‌ده شادلیق مجلیسلر و تویلار عاشیقسیز کئچمیر.

تاریخ بویونجا بیزیم چوخ بیلگین و ساوادلی عاشیقلاریمیزدا اولموشلار. اونلار گرایلی، قوشما، تجنیس، اوستادنامه، دئییشمه، مخمس، وجودنامه و دیوانی کیمی شعر نوعلاری اختراع ائتمیشلر و بو قالیبلاردا ائل ثروتینه چئوریلن و معنوی ده‌یر داشییان سؤزلر قوشموشلار و داستانلار سؤیله‌میشلر.

عاشیق موسیقی‌سی ایسه متعالی، مقبول و حلال موسیقی آدلانیر. عاشیقلار، شاعرلیکله برابر، خواننده‌لیک‌ده ائدیرلر، ساز چالیرلار و حماسی رقصلره‌ده ال آتیرلار. همده داستان سؤیله‌ییرلر و شعرلری‌نین آهنگینی ده اوزلری ایجاد ائدیرلر.

آذربایجان عاشیق یارادیجیلیغی دونیا ملّتلری فولکلور و آراسیندا، تایسیز و مثلی تاپیلمایان بیر زنگین سؤز و ساز خزینه‌سی ساییلیر. عاشیق یارادیجیلیغینا ده‌یر وئرمه و اونون انکشافی اوچون چالیشما، هامیمیزا بیر بورج حساب اولور. من سیزی همین معنوی ده‌یرلریمیز اوچون بیر یئره ییغیشمانیزا بها وئریرم، سیزی تبریک ائدیرم و داهادا جدّی آددیملار آتماق اوچون سیزه آللاهدان توفیق آرزو ائدیرم. 

دکتر حسین محمدزاده صدیق

1389

نوشتن دیدگاه


تصویر امنیتی
تصویر امنیتی جدید